Nau Hôr - Đoạn 3

1. Hơi kon, lơi ta chuêl ôh nau gâp ntĭm nti, ƀiălah ăn nuih n'hâm may djôt prăp nau gâp ntăm.

2. Yorlah nau gâp nti mra ntop ăn jŏ nar, năm may gŭ rêh jêh ri mra ăn may geh nau đăp mpăn.

3. Lơi ta chalơi ôh nau ueh jêh nau n'hêl nanê̆, kât nau nây ta trôko may; chih nau nây tâm trôm nuih n'hâm may.

4. Pôri ta năp Brah Ndu jêh ri bunuyh, may dơi geh nau yô̆ an jêh ri nau blau mĭn ngăn.

5. Rnơm hom ma Yêhôva ma lĕ nuih n'hâm jêh ri lơi nsing ôh tâm nau gĭt rbăng may nơm.

6. Moh nau kan may ƀư kah gĭt hom ma Păng, jêh ri Păng leo ntĭm trong may.

7. Lơi ta kơp may nơm blau mĭn ôh, klach yơk hom ma Yêhôva; jêh ri chalơi hom bơh nau mhĭk.

8. Nau nây mra ƀư bah sôt jreng klŏ may, jêh ri dơi sĭt suan ƀư nđik nting may,

9. Tâm rnê hom ma Yêhôva ma drăp ndơ may, nhhơr ma păng lĕ ndơ dak bôk tâm mir may.

10. Ri mơ jay ba may roch ma ba bêng ba rhiăng, jêh ri yăng may bêng ler dak n'heng dak play kriăk ƀâu.

11. Hơi kon, lơi may tâm rmot ôh ma nau Yêhôva nkra jêh ri lơi ta rdja nuih ôh ma nau păng nduyh.

12. Yorlah Yêhôva nkra ma mbu nơm păng rŏng. Nâm bu du huê mbơ̆ ƀư ma kon păng rŏng.

13. Ueh maak ngăn ma bunuyh geh nau blau mĭn, jêh ri bunuyh geh nau gĭt rbăng.

14. Yorlah ueh lơn geh păng ma đah geh prăk rêl. Kao păng ueh lơn ma prăk, khlay lơn ma mah;

15. Nau blau mĭn khlay lơn ma lŭ rsang, mâu geh du ntil may dơi rđĭl đah ndơ bu dơi ŭch.

16. Tâm ti ma păng djôt nau jong rêh, tâm ti chiau păng djôt nau ndrŏng kuăng jêh ri nau chrêk rmah.

17. Trong păng jêng trong ueh maak jêh ri lĕ rngôch trong nây jêng nau đăp mpăn.

18. Păng jêng tơm si nau rêh ma phung joi păng; jêh ri mbu nơm djôt prăp păng dơi geh nau ueh lăng da dê.

19. Ma nau blau mĭn Yêhôva njêng neh ntu; jêh ri ma nau gĭt rbăng păng dăp njêng phung mpa tâm trôk.

20. Ma nau gĭt vât păng pơk trôm jru luh dak, jêh ri dơm tŭk ăn truh dak ngom.

21. Hơi kon, djôt prăp nau blau âk jêh ri nau blau mĭn, lơi ăn păng trơn ngai ôh bơh ntŭk may.

22. Pôri khân păng mra jêng nau rêh ma huêng may jêh ri jêng ndơ nkrơ̆ văn trôko may.

23. Nôk nây may mra chuat hăn tâm trong may ma nau đăp rmên.

24. Tơlah may bêch, mâu mra geh ntil ndơ klach ôh. Ngăn yơh, may mra hăk bêch đăp mpăn.

25. Lơi ta phit phơr ôh ma nau tât ndal, ăt may mâu krit klach lĕ dôl geh nau bu ƀư rai ma phung djơh mhĭk.

26. Yor lah Yêhôva jêng ntŭk may nsing. Păng mra mât jâng may lơi ănn geh dăk.

27. Lơi ta dun ôh ƀư nau ueh ma mbu nơm geh nau khư, tơlah may dơn ƀư nau nây ma păng.

28. Lơi ta lah ôh ma nơm chiau meng dăn ma may: "Hăn hom jêh ri plơ̆ tay đŏng, ôi taơ gâp mra ăn ma may." Tơlah may lĕ geh jêh ndơ ăn nây.

29. Lơi tâm nchră ŭch ƀư mhĭk ma bunuyh chiau meng may ôh, yor păng gŭ ngao mơih rmên êp kêng may.

30. Tơlah bu mâu mâp ôh ƀư mhĭk đah may, lơi tâm rlăch đah bu mâu khlay ôh.

31. Lơi ta ndăng ôh kơt nâm bu bu nuyyh djơh mhĭk, jêh ri lơi tĭng ndô̆ trong păng ôh.

32. Yor lah Yêhôva tâm rmot ngăn ma bunuyh kue, ƀiălah lah păng njêng mĭt jiăng đah bunuyh sŏng srăng.

33. Nau Yêhôva rtăp rak gŭ tâm ngih phung ƀai, ƀiălah păng mŏt ton nau ueh uĭn ma ngih nơm sŏng.

34. Nanê̆ păng mưch ma phung mưch; ƀiălah păng yô̆ ma bunuyh dêh-rhêt.

35. Bunuyh blau mĭn mra dơi dơn nau chrêk rmah; ƀiălah phung bunuyh rluk mra geh nau prêng.