Nau Hôr - Đoạn 21

1. Nuih n'hâm hađăch jêng nâm bu du n'hor dak tâm ti Yêhôva, Yêhôva ăn păng hoch rlet ntŭk Păng ŭch.

2. Lĕ rngôch trong du huê bunuyh jêng sŏng di tĭng măt păng nơm, ƀiălah Yêhôva sek uănh nuih n'hâm.

3. Ƀư nau sŏng jêh ri nau di jêng nau Yêhôva ŭch âk lơn ma ndơ ƀư brah.

4. Măt uănh n'hao nơm, nuih n'hâm sưr rlau. Ŭnh kađen ma nơm kue, lĕ nau nây ăt jêng nau tih đŏng!

5. Nau mĭn bunuyh gơih njŭn tât ma nau rmeh ler, bi ma nơm rluk ƀư ndal ir mra njŭn ma nau pưt.

6. Drăp ndơ geh tă nau ngơi mƀruh jêng du nau dơm dam gơnh roh hêng ma phung tĭng joi nau khĭt.

7. Nau djơh mhĭk phung kue mra dŭng đot nau rêh khân păng nơm, yorlah khân păng mâu ŭch ƀư nau di.

8. Trong bunuyh tih jêng kue kuăt, ƀiălah kan bunuyh kloh rsang jêng sŏng.

9. Ueh lơn gŭ ta njônh chor ngih, ma đah gŭ du vâl ndrel ma du huê mơng tâm djrel.

10. Bunuyh djơh gay kơnh ŭch nau mhĭk, păng mâu gĭt yô̆ ôh ma nơm pĭt meng păng.

11. Tơlah bu tâm rmal nơm bu mưch, bunuyh rluk mra jêng gĭt nau tơlah bu ntĭm nti bunuyh gĭt nau, păng mra geh nau gĭt mĭn.

12. Nơm Sŏng Ngăn sek uănh n'hêl nanê̆ ngih vâl bunuyh djơh mhĭk, Nơm nây nklơ̆ phung djơh tâm nau rêh ni.

13. Mbu nơm nsêt tôr ma nau bunuyh o-ach nter, tơlah bunuyh nây mra nter ăt mâu geh lĕ bunuyh mra plơ̆ sĭt lah.

14. Ndơ ăn ma nau ndâp rthi nau ji nuih, jêh ri ăn ndơ blŏl ma nau ndâp dơi ƀư ăn djoh nau hâu ji nuih.

15. Tơlah ƀư nau di, nây jêng nau maak ăn ma phung mơih-rmên ƀiălah jêng nau krit ăn ma phung ƀư nau mhĭk.

16. Mbu moh du bơh trong nau gĭt rbăng mra gŭ rgum ta ntŭk phung khĭt.

17. Mbu nđơr ir ma nau pâl rlưn mra jêng o ach, mbu ji hir ma ndrănh jêh ri dak play ôlivơ mâu mra jêng ndrŏng ôh.

18. Bunuyh djơh jêng rnoh chuai ăn ma bunuyh sŏng, jêh ri bunuyh mƀruh rlăm ntrok ntŭk ma bunuyh mơih-rmên.

19. Ueh lơn gŭ tâm ntŭk rngơt-rklăk, ma đah gŭ ndrel ma du huê bu ur vay mơng tâm djrel jêh ri hay ji nuih.

20. Phung gĭt nau prăp drăp ndơ khlay jêh ri dak play ôlivơ tâm vâl păng, ƀiălah bunuyh rluk sa lơi ăn lĕ ndơ păng geh.

21. Mbu nơm tĭng joi nau sŏng jêh ri nau ueh mra saơ nau rêh, nau mơih-rmên jêh ri nau bu yơk.

22. Bunuyh gĭt nau hao mpêr ƀon toyh phung janh katang, jêh ri păng lơh rlâm ntŭk pôih khân păng nsing.

23. Mbu moh mêm prăp trôm mbung jêh ri mpiăt păng mât huêng păng nơm klaih bơh nau uh ah.

24. Bu ntơ "bunuyh vay mơng mưch" jêng nơm sưr jêh ri n'hao săk nơm, păng ƀư nau mƀruh jêh ri sưr rlau.

25. Nau kơnh bunuyh ƀlao gay ŭch nkhĭt êng păng nơm, yorlah ti păng dun pah kan.

26. Geh bunuyh kêng lôch nar kanŏng gay ŭch geh ndơ dơm, ƀiălah bunuyh sŏng ăn dơm mâu nhhuach ôh.

27. Yêhôva tâm rmot ngăn ma ndơ phung ƀai ƀư brah, lơ hâu ma nây tơlah khân păng nhhơr ma nau mĭn djơh mhĭk.

28. Nơm nkoch mƀruh mra rai roh, ƀiălah bunuyh tông bâr mra dơi ngơi mro.

29. Bunuyh djơh jan lah ƀư janh, ƀiălah bunuyh sŏng ƀư nâp ajăp trong păng nơm.

30. Mâu dơi geh ôh nau blau mĭn mâu lah nau gĭt rbăng, kŏ mâu geh lĕ nau nchră dơi tâm rdâng đah Yêhôva.

31. Bu ndrăp seh prăp ma nar tâm lơh, ƀiălah Yêhôva mơ ăn nau dơi.