Nau Hôr - Đoạn 18

1. Du huê bunuyh gŭ êng mâu lăp băl ôh gay joi nau păng nơm ŭch păng tâm rlăch ma lĕ nau mĭn di.

2. Bunuyh rluk mâu ŭch ôh ma nau gĭt rbăng; ƀiălah kanŏng ŭch mbơh nau păng nơm mĭn.

3. Tơ lah phung ƀai văch tât geh nau mưch rmot ăt tât đŏng; tơlah geh nau prêng geh nau nduyh tâm ban lĕ.

4. Nau ngơi tâm bâr mbung bunuyh jêng tâm ban dak klŏng jru; tu nau blau mĭn jêng dak n'hor dôl hoch.

5. Mâu ueh ôh gŭ mpeh bunuyh ƀai, gay nsŭk ndơm bunuyh sŏng tâm nau phat nkra di.

6. Mpiăt bunuyh rluk ăn tât ma nau tâm djrel; jêh ri bâr mbung păng ngơi nsônh ăn bu dong păng.

7. Bâr mbung bunuyh rluk jêng nau ƀư roh păng nơm jêh ri mpiăt păng jêng dăk sân ma huêng păng.

8. Nau ngơi bunuyh nkoch bri njĭp jêng nâm bu ndơ sa kah, jêh ri păng lăp jru tâm proch klơm.

9. Mbu nơm ƀlao tâm kan păng pah ăt jêng oh mon đah nơm ƀư rai đŏng.

10. Moh Yêhôva jêng pôih nâp ngăn; bunuyh sŏng srăng nchuăt ran ta nây, dơi geh ntŭk nde đăp rmên ngăn.

11. Drăp ndơ bunuyh ndrŏng, nây jêng ƀon toyh nâp ma păng; ntôn lah nâm bu pêr prêh nking păng.

12. Êlor ma nau rai lôch tât, nuih n'hâm păng ăt ngơi sưr; ƀiălah nau dêh rhêt hăn panăp ma nau bu yơk.

13. Mplơ̆ lah ro ê hŏ iăt lor, nau nây jêng nau rluk jêh ri ƀư prêng ma mbu nơm ƀư pô nây.

14. Huêng bunuyh kuăn rdâng păng roh jêh nau kâp gân mâm păng dơi srôih?

15. Nuih n'hâm gĭt vât joi nau gĭt mĭn âk, jêh ri tôr phung blau mĭn tĭng joi nau gĭt rbăng.

16. Ndơ du huê bunuyh djôt leo nhhơr mra pơk trong ma păng; jêh ri dơi ăn păng lăp panăp phung toyh.

17. Nơm ngơi lor bu mĭn lĕ di nau păng; ƀiălah mpeh đah ri văch tât, bu ôp sek păng.

18. Nau sŏk nchroh dơi ƀư lôch nau tâm rlăch, gay geh nau săch dơn ndrăng phung geh nau dơi toyh.

19. Du huê oh mon bu nsak jêh jêng jêr lơn gay dơi geh tay păng ma đah pit in ƀon toyh; jêh ri nau tâm djrel jêng nâm bu rnăng mpông loih lĕ nchăng jêh.

20. Du huê bunuyh ngơi mra dơi hơm ndŭl păng; păng hơm ma play rek bơh nau bâr păng ngơi.

21. Rêh khĭt gŭ tâm nau dơi mpiăt; pôri bu mra sŏk dơn tĭng nau păng ngơi.

22. Mbu nơm joi du huê ur, geh jêh nau ueh; jêh ri sŏk dơn nau yô̆ bơh Yêhôva.

23. bunuyh o ach vơl nau yô̆; ƀiălah bunuyh ndrŏng plơ̆ lah ma nau ngơi dăng.

24. bunuyh geh âk mĭt jiăng ƀư djơh păng nơm; ƀiălah geh du huê mĭt jiăng vay dơh dăch lơn ma oh nâu du ndŭl deh.