2 Y-Timôthê - Đoạn 1

1. Y-Pôl, kôranh oh mon Yêsu Krist, tĭng nâm nau Brah Ndu ŭch, ăn mbơh nau ton ma nau rêh tâm Yêsu Krist,

2. Njuăl samƀŭt ma Y-Timôthê, kon gâp rŏng ngăn ngên: Gâp ŭch ma Brah Ndu, Mbơ̆, jêh ri Yêsu Krist, Kôranh Brah he, ăn ma may nau yô̆, nau ueh, jêh ri nau đăp mpăn.

3. Gâp tâm rnê ma Brah Ndu, Nơm u che gâp yơk, jêh ri nơm gâp yơk ma nuih n'hâm sŏng kloh jêh ri gâp kah gĭt ma may ƀaƀơ dôl gâp mbơh sơm.

4. Tơlah gâp kah gĭt ma dak măt may, jêh ri nar măng ŭch ngăn saơ may, pôri gâp mra bêng ma nau răm maak.

5. Gâp kah gĭt lĕ ma nau may chroh răp jăp. Nau chroh nây gŭ jêh lor tâm u may H'Lôis jêh ri tâm mê̆ may H'Ônis, jêh ri gâp gĭt ngăn jêh ma nau chroh nây gŭ lĕ tâm may.

6. Pôri gâp nkah may ăn ntrôt tay nau Brah Ndu ăn jêh ma may ma nau gâp pah ti ta may.

7. Yorlah Brah Ndu mâu ăn ôh ma he huêng nau klach, ƀiălah huêng nau brah, blau rŏng jêh ri blau njrăng.

8. Lơi prêng ôh mbơh nau Kôranh Brah he, mâu lah ma gâp, nơm jêng bu nă yor păng, ƀiălah dơn nau rêh ni ndrel ma gâp yor nau mhe mhan ueh ma nau brah Brah Ndu,

9. Nơm tâm rklaih jêh he, jêh ri kuăl jêh he ma nau kuăl kloh ueh, mâu di yor kan he ôh, ƀiălah tĭng nâm nau păng săch, jêh ri tĭng nâm nau yô̆ păng ăn jêh ma he tâm Yêsu Krist lor ma lĕ rngôch rnôk n'ho ro.

10. Jêh ri tâm mpơl aƀaơ aơ ma nau Nơm tâm rklaih he, Yêsu Krist văch jêh, Nơm ƀư rai jêh nau khĭt jêh ri tâm mpơl jêh nau rêh jêh ri nau mâu blau khĭt ma nau mhe mhan ueh.

11. Ma nau mhe mhan ueh aơ yơh gâp jêng nơm nti jêh ri kôranh oh mon, geh nau ntăm sâm nti phung bu năch.

12. Yor nau nây yơh gâp dơn nau rêh ni aơ; ƀiălah gâp mâu prêng ôh, yorlah gâp gĭt ma mbu nơm gâp chroh jêh ri gâp gĭt ngăn ma păng geh nau brah dơi chiă uănh ndơ gâp jao jêh ma păng tât nar nây.

13. Ăn may djôt prăp tâm nau chroh jêh ri nau rŏng tâm Yêsu Krist nau tâm ntĭt tâm nau ngơi kloh may sŏk dơn jêh bơh gâp.

14. Djôt prăp ndơ ueh jao jêh ma may ma Brah Huêng Ueh gŭ tâm he.

15. May gĭt jêh lĕ phung tâm n'gor Asi chalơi jêh gâp. Tâm phung khân păng geh Y-Phigel jêh ri Y-Hêrmôgen.

16. Ăn Kôranh Brah yô̆ ma ngih Y-Ônêsiphor yorlah păng bonh jêh gâp ƀaƀơ, jêh ri păng mâu prêng ôh ma rse rvăk gâp,

17. ƀiălah tơlah păng tât jêh ta ƀon Rôm, păng joi gâp hâu ngăn, jêh ri păng saơ gâp.

18. Gay ma Kôranh Brah tâm nar nây jêh ri may gĭt ngăn jêh lĕ nau păng kơl ta ƀon Êphêsô.