1 Y-Timôthê - Đoạn 2

1. Lor ma lĕ rngôch ndơ gâp ntăm ma may ăn mbơh sơm, vơh vơl, dăn, jêh ri kah gĭt tôr ma Brah Ndu yor lĕ rngôch bunuyh,

2. ma phung hđăch jêh ri ma lĕ rngôch phung kôranh chiă uănh, gay ma he dơi gŭ đăp mpăn jêh ri mâu geh rŭng tâm lĕ nau blau yơk ma Brah Ndu jêh ri lĕ nau sŏng srăng.

3. Nau nây ueh jêh ri maak ta năp Brah Ndu, Nơm Tâm Rklaih he.

4. Păng ŭch ma lĕ rngôch bunuyh dơi klaih,

5. jêh ri knŏng du huê Brah Ndu jêh ri knŏng du huê Nơm tâm nklang Brah Ndu đah bunuyh, Yêsu Krist, bunuyh.

6. Nơm jao jêh Păng nơm gay ma tâm chuai lĕ rngôch bunuyh; pôri jêng nau mbơh jêh tâm rnôk di,

7. jêh ri ma nơm nây gâp jêng nơm nti jêh ri kôranh oh mon ăn nti ma phung bu năch tâm nau chroh jêh ri nau nanê̆. (Gâp ngơi nau nanê̆, gâp mâu mƀruh ôh).

8. Gâp ŭch ma phung bu klâu mbơh sơm tâm lĕ ntŭk, yơr ti kloh mâu geh nau khek biănh mâu lah nau mĭn mhĭk ôh.

9. Gâp ŭch lĕ ma phung bu ur mbăn nah bŭt soh ao ma nau di, ma nau gĭt rbăng, jêh ri ma nau sŏng, mâu păch sŏk, dơm mah, lŭ ang, mâu lah soh ao ƀư mbrưh ôh,

10. ƀiălah ăn kan ueh jêng ndơ nkrơ̆ khân păng. Nau nây jêng di ma phung bu ur nkoch khân păng pah kan ma Brah Ndu.

11. Ăn phung bu ur gŭ rklăk dôl gŭ iăt nau nti ma nau blau tông ngăn.

12. Gâp mâu ăn ôh phung bu ur nti lah, mâu lah jêng kôranh ma bu klâu, ƀiălah ăn khân păng gŭ rklăk.

13. Yorlah Brah Ndu njêng Y-Ađam lor, jêh ri H'Evơ pakơi,

14. jêh ri mâu geh ôh Y-Ađam geh nau ndơm, ƀiălah bu ur geh nau ndơm jêng tih rlau nau vay.

15. Ƀiălah phung bu ur mra klaih tâm nau khân păng jêng mê̆, tơlah khân păng srôih gŭ sŏng tâm nau chroh, tâm nau rŏng, jêh ri tâm nau kloh ueh.