1 Têsalônik - Đoạn 4

1. Pôri, hơi phung oh nâu, hên vơh vơl jêh ri nchâp khân may tâm Kôranh Brah, Brah Yêsu nâm bu khân may nti jêh bơh hên mâm ƀư khân may mra gŭ ngao krao sach jêh ri ƀư maak ma Brah Ndu, nâm bu khân may hŏ ƀư jêh, ăn khân may ƀư pô nây rlau lơn.

2. Yorlah khân may gĭt moh nau ntăm hên ăn jêh ma khân may bơh Kôranh Brah Yêsu.

3. Yorlah pô aơ nau Brah Ndu ŭch, nau khân may jêng kloh ueh, nau khân may dun nau văng tĭr:

4. Jêh ri ăn ăp nơm khân may blau chiă uănh săk jăn păng tâm nau kloh ueh, jêh ri tâm nau sŏng srăng,

5. mâu di tông ma nau kơnh ngăn nâm bu phung bu năch mâu gĭt năl Brah Ndu.

6. Lơi ăn geh bunuyh ndơm mâu lah ƀư tih oh nâu păng tâm nau nây ôh, yorlah Kôranh Brah mra plơng bôk ma lĕ nau nây, nâm bu hên lah jêh ri mbơh jêh ma khân may.

7. Yorlah Brah Ndu mâu kuăl he ma nau ƀơ̆ ôh, ƀiălah ma nau kloh ueh.

8. Pôri, mbu nơm dun nau ntăm aơ, păng mâu dun bunuyh ôh, ƀiălah Brah Ndu, nơm ăn jêh ma khân may Brah Huêng Ueh păng.

9. Bi ma nau rŏng ndrăng oh nâu, khân may mâu hôm ŭch ôh bu nchih ma khân may, yorlah khân may nơm nti jêh bơh Brah Ndu nau tâm rŏng ndrăng khân may.

10. Jêh ri nanê̆ khân may rŏng ma lĕ rngôch phung oh nâu tâm n'gor Masêđôn. Ƀiălah, hơi oh nâu, hên vơh vơl ma khân may ăn tâm rŏng âk lơn ƀaƀơ.

11. Jêh ri ăn khân may ŭch ngăn gŭ đăp mpăn, mĭn ma kan khân may nơm jêh ri pah kan ma ti khân may nơm nâm bu hên ntăm jêh ma khân may,

12. gay ma khân may gŭ ngao krao sach sŏng srăng đah phung padih, jêh ri mâu rnơm ma bu ôh.

13. Hơi phung oh nâu, hên mâu ŭch ôh ma khân may mâu gĭt rbăng ma nau phung bêch jêh, ŭch ma khân may lơi rngot, nâm bu phung êng mâu geh nau kâp gân.

14. Tơlah he chroh ma Brah Yêsu khĭt jêh ri dâk rêh jêh, ăn he chroh tâm ban lĕ đah Brah Yêsu, Brah Ndu mra njŭn leo phung bêch jêh,

15. Ma yorlah nau aơ hên mbơh ma khân may tĭng nâm Nau Kôranh Brah Ngơi, ma phung he hôm gŭ rêh tât ta nar Kôranh Brah plơ̆ văch, he mâu mra rlet lor ôh ma phung bêch jêh.

16. Yorlah Kôranh Brah Nơm mra jŭr bơh trôk geh nau nter toyh, đah bâr kôranh tông păr ueh Brah Ndu, jêh ri đah bâr nŭng Brah Ndu, jêh ri phung khĭt tâm Brah Krist mra dâk rêh lor lơn.

17. Jêh ta nây phung he, hôm gŭ rêh ta aơ, bu mra chông ndrel đah khân păng tâm ndâr tŭk, tâm mâp đah Kôranh Brah tâm sial ndăng. Pô nây he mra gŭ ndrel ƀaƀơ đah Kôranh Brah.

18. Pôri ăn khân may tâm bonh leng ndrăng khân may đah nau ngơi aơ.